افترض ان احنا مش افتراضيين فى عالم افتراضى او ان احنا افتراضيين فى عالم مش افتراضى افترض ان الدنيا هى اللى فرضه نفسها علينا مش احنا اللى فرضنا الهم لغاية ما بقى عقيدة
افترض اليوم اللى مشينا فيه ع السما مكنش افتراضى واليوم اللى اتنططنا بين النجوم مكنش افتراضى واليوم اللى الاطفال طارت فى الفضا وعملت حلقات حب وشجن فى الهوا مكنش افتراضى وافترض اليوم اللى الناس كلها قامت ترقص رقصة واحدة كبيرة مكنش افتراضى
لكن افرض اليوم اللى شفتنى ادامك ومبصتليش ده كان يوم افتراضى واليوم اللى عضامنا طبقت على قلوبنا عصرتها لحد اخر نفس كان افتراضى واليوم اللى الاطفال كلها ماتت فيه من الجوع والالم كان افتراضى واليوم اللى خلونا نسيب مكاننا ونتفرق لحد مانسينا اصلنا وارضنا ده من فضلك يبقى يوم افتراضى
