just for vendat

اريد ان اكتب الى حد الانتقام .. اريد ان اكره الى حد الانتقام .. اريد ان اقوم بكل الافعال البشريه ونقيضها الى حد الانتقام .. اريد ان اتوقف عن البكاء كلما اغضبنى شئ -مثل الاطفال- وابقى على هذا الوضع سنين ثم اجن وانهار
اريد ان اتوقف عن التعامل مع البشر تماما ونهائيا لانى اصبحت لا افهمهم لا افهم ارتباطهم الايجابى والسلبى ببعضهم البعض يحبون بعضهم لدرجه مريبه ويكرهون بعضهم جدا واشياء اخرى بينهم مثل نفاقهم لبعضهم وغيرها من افعال فى المنتصف بين حبهم وكرههم يبررونها مبررات غريبه
لكن الملاحظ انه فى تعاملى مع البشر اتعامل بحقاره مع بشر لا يستحقون ذلك واسعى وبمحض ارادتى لاشخاص يتعمدون اذلاالى وتعذيبى او حتى لا يهتمون بى مطلقا
اجبن من ان اواجه نفسى واواجههم بالحقيقه اكره نفسى واكرههم ومرات اخرى اشفق على نفسى واشفق عليهم لاضطررارهم او رغبتهم فى التعامل معى
اريد ان افقد عقلى

معاق لا تعنى درجة تانية

لم اكن اعتبر نفسى يوما منهم ولم اصنف نفسى ذلك التصنيف ابدا -رغم انة هو الصحيح- ودائما ما انظر الى مشاكلهم نظرة خارجية .
من الممكن ان يرجع ذلك لاعتقاد غريب براسى انه من يكون خارج الموضوع يهتم بة اكثر او يجد طرقا اكثر لحلة سواء كان ذلك صحيحا او خاطئا .
ومن الممكن ان يرجع ذلك اننا فى مجتمع يتعامل مع المعاق كدرجة ثانية تتحاشوا التكلم معهم تعتقدوا دائما انة لابد وان يوجد وصيا يرافقهم ويقوم على شؤنهم ويسوء الامر كلما زادت الاعاقة .وانا الاكيد كغيرى من المعاقين لا نرى فى انفسنا مواطنين درجة ثانية مع احتياجنا لبعض المساعدة او الكثير منها لكننا لسنا درجة ثانية .
وفى ظل معايشتى لهذا المجتمع كنت ولفترة طويلة ارفض التحدث فى هذا الامر ارفض اى شئ يصنفنى هذا التصنيف .
ومع اعترافى الان وانا بكامل وعيى انى مخطئة فى هذا لكن ايضا احمل المجتمع جزء من المسؤلية مجتمع يهمشنا ويفرض وصاية علينا ويجعل منا مواطنين درجة ثانية لكنة فى الاصل لا يعطينا حقوقنا ويعاملنا كما يعامل كل الاقليات بدونية وحقارة .
انا ومن الان اعترف باعاقتى وابدا انا ومن معى فى نضالنا للزفر بحقوقنا واقول للمجتمع "معاق لا تعنى درجة ثانية" "اقلية لا تعنى ادنى منكم "

ارجو ان تصححوا لى ان كنت مخطئة.

الى روحك التى ترفرف فى المكان : لا تتركنى

تذكرتك فى ذلك اليوم وبشدة فقد كنا نرتب الكتب التى قضيت عمرك تجمع فيها لتصبح مكتبة تبهر كل من يراها ونظل ولوقت طويل نترحم عليك كلما رايناها .. فى هذا اليوم اهديت كل العمل الذى قمت به -وهو ليس بالعمل الكثير- لروحك الطاهرة
بناتك تراجعوا عن فكرة بيع الكتب بعدما وجدوا اشخاص كثيرين مهتمين بها لن تتخيل عدد الاشخاص الذين فرحوا بالفكرة وترحموا على روحك مرارا وتكرارا نحن ايضا لم نكف عن الترحم على روحك وعلى روح نانا ايضا
اعتقد انك لو كنت موجود الان كانت حياتى ستختلف تماما انا اجزم بذلك لكن ماباليد حيله ارجو ان تكون فى مكان افضل ارجو ان تشعر بالناس التى تدرك عظمتك الان
اريد ان انشئ مكتبة وافكر فى ذلك جديا لتكون تخليدا لذكراك وقررت انا واختى ان نضع فيها تمثال لك ارجو ان تكون سعيدا بتلك الفكرة كما ارجو ان تقرأ كل الكتب معى واذا اردت قرأة كتب اخرى اخبرنى فقط
الى اللقاء القريب

عمرنا مات ولا عايش

لقد انقضت الطفوله ومن بعدها الشباب بما سيفيد الان الترميم لقد انقضت السنين بكل ماسيها اسيفيد الان ان نقضى على مسببات التعاسه بعدما حدث ما حدث بعدما مررنا بالمكتوب بعدما تشربنا به وزرع فينا ما زرع من عقد ما الفائده الان ان نقضى على مسببات التعاسه اسيعيد لنا ما مضى من سنوات اسيشفى الجروح التى زرعها فينا وفيمن حولنا لا تزيدنى هما على همى يا امى يكفى ما فعلته بى الدنيا اعرف ان القلق يقتلك على لكن لا تقلقى يا اماه فلقد علمتنى الدنيا ان اتعامل مع عاهاتى والا فلانسحب بهدوء فهذا زمن الاقوياء والضعفاء يمتنعون

خزعبلات ليس اكثر

لا اعرف ماذا جال بخاطرى عندما وجدت رقما يشبه رقمك يظهر على شاشة هاتفى .يالسذاجتى !! كيف تصورت انه انت تتصل بى ااصبحت بهذا الغباء؟؟؟
تحت اى ظرف ستكون انت لماذا انت لقد نسيت للحظه انه لا يوجد ما يجمع بيننا حتى تتصل بى نسيت انك قلت انك لن تحبنى تحت اى ظرف وانا استمعت الى كل تلك الاهانات ولم ارد عليك حتى لا اخسرك حتى لا اخسر ان اسمع صوتك
لكن اليوم بعد مضى زمن على كل ما حدث بيننا لماذا انت؟؟؟!!! لماذا ستتصل بى .ااكتشفت ما اعترانى من حبك وقررت ان تخفف على لوعة الفراق ام انك اكتشفت الكذبه السخيفه التى مثلتها عليك وتتصل لتاخذ حقك منى دون ان تعرف الاسباب التى جعلتنى اسير فى تلك الكذبه السخيفه .لقد كنت اكره نفسى كل يوم وانا استمر فى تلك الخدعه التى لا معنى لةا لكن كان دافعى الاساسى فى ذلك هو ان اكون بجانبك ان اسمع اخبارك واستمع اليك واخفف عنك واطمئن عليك لا دافع لى سوى ذلك فانه ومنذ القدم نجد البشر يفعلون المستحيل ليبقوا بجانب احبابهم فهاهى ام موسى ترضى بان تكون مربيه وكانت لترضى باقل من ذلك لتكون بجانب ابنها. ةانت ابنى وساظل دائما فى حالة قلق عليك
كل هذه المشاعر كنت قد فقدتها منذ زمن كيف يمكن لنا ان ندفن احاسيسانا ومشاعرنا لتهب رياح خفيفه فتخرجها من رقدتها وتوقظها فتصبح كالمارد الجبار الذى لا يوقفه شئ لكنى ساعمل جاهده حتى ادفنها مرة اخرى فلا مكان لها فى هذا الزمان فلنؤدها اذن فلنضربها فى مقتل حتى نتخلص من اى شئ يربطنا بالانسانيه فنحن فى زمن نرى اخواتنا يموتون جوعا ولا نحرك ساكنا
لكن انها سخرية القدر فعندما رددت كانت سيده من الشركه التابع لها خط الهاتف تقوم بوظيفتها واخذت تتحدث فى كلام اصم لا روح فيه ودون اى انفعال او تاثر فهى بالتاكيد لا تعرف ما فعله بى اتصالها

عسكر كمان وكمان

وانا اكتب الان وبمنتهى الصراحه رايى فى المجلس العسكرى لا اعرف اذا كان سيلقى اصداء واسعه لدى الناس ام لا والاهم هل سيلقى اصداء واسعه لدى المجلس ام لا ولا حيقول عليه كلام مخابيل والمقصود بالاصداء الواسعه هو الا يعجبه ما اقول فيفعل بى كما يفعل بكل المدونين والتويتريين والفيسبوكيين ايضا وغيرهم من مستخدمى التكنولوجيا الحديثه الذين يخرجون كبتهم من المجلس العسكرى على هذه المواقع فلا يكون من المجلس ان يفعل بهم ما لم يستطع ان يفعله اى كائن قبله ويستدعى هؤلاء الشباب وكل واحد وحظه يتضرب بقى لحد ما يبنله صاحب والله بقى له صحاب كتير زى اسماء ولؤى يعفو عنهم ملهمش حد وغلبانين يعمل فيهم زى الناس اللى اداها احكام والناس التانيه اللى لحد دلوقتى محدش يعرف عنهم حاجه وده اكبر مثال على ان الخيار والفأوس موجود كمان حتى فى الحبس لو رجعنا بقى لشخصى الكريم فالمجلس لن يقلق اطلاقا فانا اهلى فى الاغلب الاعم حيتبروا منى عشان يعرفوا يربوا باقى اخواتى بدل ما يتيتموا

المهم بقى وانا قاعده كده فاضيه ومبعملش حاجه قررت اعد  ادردش معاك ياعم المجلس طبعا انت معندكش اعتراض

افتكرت زمان زمان اوى يجى كده من 7 شهور لما حضرتك نزلت الميادين وشفت المتظاهرين وهما طبعا بطيبه قلبهم فضلوا يهتفوا للجيش مش ليك ويبوسوا فى الجيش ويتصوروا مع الدبابه وكل الحاجات اللى حضرتك عارفها دى طبعا الموقف معجبكش وخلى منظرك وحش اوى المهم اتضريت طبعا ترفع الرايه البيضاء وطلعتلنا باغنيه الموسم "الجيش حمى الثوره" ومن يوميها وانت مسكلنا فيها

طبعا كانت بتحصل الكوارث ادامك وانت واقف تتفرج يعنى تيجى موقعه الجمل متفتحش بقك متدفعش عن الثوار ولا حتى عن اللى ضرب الثوار لا الصراحه راجل

وييجى عساكر من عند حضرتك ينضموا للثوار حضرتك تاخدهم توديهم ورا الشمس محدش يعرف مكانهم .هما فين صحيح؟

واخر يوم وبشهادة الشهود لما اتنحى عمو حسنى تيجى حضرتك تضرب ناس وتاخدلك رزمه ناس ومحدش يعرف عنهم حاجه

تيجى بعدها انتفاضه فلسطين التالته يقف شباب زى الورد ادام سفارة لمؤاخذه اسرائيل تاخدهم محدش يعرف لهم طريق جره وترجع تقول انك حميت الثوره

تساوم اهالى الشهدا عشان يتنازلوا عن المحاضر اللى عملينها وترجع تقولى حميت الثوره

تحاول تهزر معانا هزار تقيل شويه وتعمل قانون تجريم الاعتصامات والمظاهرات فى سابقه من نوعها وتقول حميت الثوره

تعد تطبطب على اللى عليهم قواضى فساد وقتل متظاهرين وطبعا اكبرهم مبارك وتاجل كل شويه فى المحاكمات ومتطلعش قرار ضدهم غير لما الناس تتظاهر وتعتصم وبرضه برضه تقول حميت الثوره

تحطنا فى الغساله وتشغلها على اعلى سرعه وتقلبلنا دماغنا بتعديلات دستوريه ودستور جديد وبرلمان نضيف وكل الكلام الكبير ده وتنسى المبادئ الاساسيه للثوره "كرامه.حريه.عداله اجتماعيه" وبعد كده تخترع مبادئ فوق دستوريه وكل ده عشان تدى نفسك شرعيه مزيفه

واخر بلاويك السوده تضرب الناس فى التحرير وتمشيهم بالعافيه وتكسرلهم خيامهم واجهزتهم وتحتل انت الميدان وشكلك كده قريب حتهتف ضد الشعب

وحساك كده قاعد ومرحرح وشكلك ولا ناوى تنقل السلطه نقل سلمى ولا حتى مش سلمى .ايه هى عجبتك الاعده عادى يعنى ده احنا نضيفوك برضه ولا نضيفوك ليه مانت بقيت صاحب مكان وواخد راحتك عالاخر اهو

والوضع يخويا زى ماهو ولا اجور الناس زادت ولا بقت عايشه احسن ولا سرعت بالمحاكمات حبه وكمان لغيت العلنيه ووصلنى كده ان اللى انت واخدهم لحد دلوقتى وصلوا ل12000 حقيقى الكلام ده ولا اوشاعات

والزغلول الكبير بقى اخر حاجه اللى لسه حاصل ولا انت مسمعتش مات 3 جنود عالحدود فين بقى يخويا بياناتك الجامده اللى كل شويه بتطلعلنا بيها والاهم اين صباع الفنجرى يعنى اشمعنى الحاجات بتطلعلنا احنا بس

يعنى تقريبا دى اغلب الحاجات واتمنى مكنش نسيت حاجه فى نشيد الذكريات ده

وسؤال بقى اخير للمشاهدين اللى يعرف الاجابه حياخد محاكمه عسكريه مجانا .هو المجلس العسكرى حمى الثوره من ايه بالظبط ؟من نفسه؟؟؟؟؟؟؟

يوم فى اتصالات

طبعا لا يوجد لدى اى غرض دينى فى تحويل خطى من موبينيل الى اتصالات لكن طبعا وقعان الشبكه بتاعت موبينيل هو اللى خلانى احوله لكن وجودك فى الفتره دى فى شركة اتصالات حتى لو كنت داخل تسلم على واحد صاحبك حتلبس مع الناس وش ان ربنا فتحها عليك وانك لا تقبل الاهانه اللى اهانها ساويرس للاسلام !!!!!!! وجاى تغير الخط


ليا بقى لوكشة (اى حبة) تحفظات عالموضوع ده والتى تتمثل فى عدة نقاط نبتدى باهم نقطه اللى هى بتقول لو احنا نعتبر شخصيتين كرتونيتين مثل ميكى ومينى لما يلبسوا نقاب ولا يربولهم دقنهم شئ بيسيء للاسلام يبقى قياسا على هذا الكلام تبقى كمان عروسة الاطفال الملقبه ب(فله)هى كمان مسيئه وبجد نفسى حد يرد عليا فى الكلام ده
وبعدين بقى تانى حاجه انا عندى 100000 سبب يخلونى اقاطع نجيب ساويرس غير الحوار ده وده مش عشان انا مش بحب دينى او مش غيوره عليه زى ما الناس حتعتقد لكن عشان لو نفكر شويه نجيب ساويرس ده من القله المسيطره على كل حاجه زى كل امثاله-من المستثمرين-بيمتلك كل حاجه وسايب ملايين حواليه بيموتوا من الفقر والجوع دى حاجه ميتغفرلوش عليها اكتر من اى حاجه تانيه يعنى اعتقد-والعلم عند الله-ممكن يغفر اللى هو عمله وميغفرش الملايين اللى بيموتوا حواليه وهو بيقف سلبى
وغير انه على مستوى اخر بيستغل العملاء بتوع شركته ويسرقهم على اد ما يقدر وبالدليل.وبعدين سؤال هام بقى لكل الناس اللى مقاطعه انتوا بقى قاطعتوا كل حاجه بتاعته ولا شركه الموبيلات وبس وبعدين ده زى مابيقولوا له فى كل خرابه عفريت يعنى له فى كل شركه سهم دوروا بقى وشوفوا حتقطعوا ايه ولا ايه
وبعدين الناس دى بقى العزه خدتهم اوى وفضلوا يعملوا صورة نجيب ساويرس عالفوتوشوب واكثرها اساءه على الاطلاق اللى عملته على شكل قرد فى الحقيقه ده لا يصح لانه مش سخريه من الشخص ده كده سخريه من خلقة ربنا وانتوا اكيد اكثر منى علما بالدين فهل هذا يصح ؟؟؟؟؟؟!!!!!!!
يعنى انا بس كل املى فى الدنيا ان الناس تبطل تصدق اى حمله وتمشى وراها سواء كانت من اخوانا البعدا ولا القربا مقاطعة سيادتكم لشركته لن تضر فى شئ لانه من المؤكد له اسهم فى مصر كلها و بره مصر كمان
وبعدين الناس الحلوه اللى عملت الحمله دى متشد حيلها وتكثف جهودها فى حمله مقاطعة المنتجات الاسرائيليه يمكن فعلا ساعتها يفلسوا!!!!!!

صراع

اشعر كانى عاريه على سفح جبل عالي مغطى بالثلج وحيده تماما تفوح منى رائحه الدم . 

والذئاب حولي من كل جانب تلهث بشوق وجوع 

وتنتابني رغبة قويه فى التخلص من قيودي لكن تمنعني الذكريات وحب الحياه وبعض التقاليد الباليه 

لا اعرف لاي منتهى سانتهى ولاي منقلب سانقلب 

وافكر فيمن هم حالهم اسوأ من حالي فاستجمع قواي حتى اهب لمساعدتهم فتشدني القيود مره اخرى لاسفل . 

ينتابني اكتئاب عارم ورغبة قويه فى البكاء 

وعندما اقرر كسر هذه القيود تزيد من قبضتها على حتى اصبح وكانى انا وهى كائن واحد 

ولا اعرف الام سانتهى ولاي منقلب سانقلب .

1/2 يوم مع سعد

يمكن ده مش اول يوم ولا اليوم الوحيد اللى نزلت فيه الميدان لكن كان يوم مهم عشان النهارده كنت واقفه مع اللجان الشعبيه واللى بتوفرلك ميزتين الاولى انك تحس انك بتعمل حاجه وتانى حاجه انك تجس نبض الشارع
فى الاول واول ما كنت داخله ناس لطيفه جدا استقبلتنى بابتسامه جميله وكان البوابه هى الخط الفاصل ما بين عالم كئيب وعالم تانى خالص لطيف وفيه كل الناس بتحب بعض وبتساعد بعض وكانه عالم ملائكى بعد كده وقفت معاهم عالبوابه عشان افتش البنات وده كان له طريقين ناس بتتقبل الموضوع جدا وبصدر رحب وناس تانيه بتنشن زى الدكتوره اللى حاولت تدخل ولما قلنالها البطاقه رفضت وفضلت تزعق وقالت انا ميشرفنيش انى ادخل وخرجت فى حين كان فيه دكتور معاها كان متقبل الوضع جدا وفضل يتكلم معانا ويشجعنا
اما بقى بالنسبه للناس اللى كانت بتقف وتتفرج علينا من بعيد فحصل ولا حرج وكاننا لامؤاخذه حيوانات فى الجنينه ودول كانوا كتيير جدا بس حقيقى كان بيبقى نفسى يجوا يسالونى انتوا بتعملوا ايه عشان اقولهم واحاول اقنعهم ينضمولنا بس اكيد مكنش نفسى يبقى زى اللى عمل نفسه ليبى وجه سالنا " ايش يعنى اعتصام .. احنا عندنا ضرب " ولما واحد كشفه قالوا انا من مصر
وبقى اكتر حاجه عجبتنى كانت سيده جت متعرفناش خالص وسبتلنا اكل وحاجه ساقعه شرياهم مخصوص لاهالى الشهدا
وتانى حاجه كانت حاجه عجوزه خالص جسمها ضئيل جدا كانت جيبه ابنها بعد ما طلعت من المستشفى وجت عشان تتضامن معانا وكمان ابنها وهما ماشيين قالها اوصلك وانزلهم بجد فرحتنى اوى بس بقى ابنها ده قلنا حاجه عظيمه جدا ان فى واحد بره بيقول ان الناس اللى جوه دى فيهم واحد كبيرهم وبيديهم فلوس بجد مش فاهمه عقول الناس دى حتتغير امتى
وطبعا مفيش مانع من بعض ال suspens اللى كان موجود فقد وجدنا احد المسجلين خطر الهاربين بس المشكله ان هما اكتفوا ان هما حذروه وهددوه انه يجى هناك تانى وبس على كده
وكمان كان فيه بقى محمد ومحمود دول اخين بيبعوا مناديل بس كوتى اوى حلوين خالص
وطبعا كان فيه ناس كتير جدا من اللى تيجى تقف ومتعملش اى حاجه غير ان هى تهاجمك وتشكك فى نزاهتك زى صديقنا اللى جه وقف وفضل يسال مين اللى جاب الخيم ولما محدش عرف يرد عليه قعد يقول اهو محدش عارف بس انا مسكتش بقى وقررت ادخل فى النقاش لولا احمد اللى بعدنى عن المناقشه عشان اشوف شغلى وكان عنده حق لان هذا الصديق العظيم فضل يتناقش ساعه فى اى هرتله وانضمله بعض مؤيدينه وبعض معارضيه
هو مكنش يوم على بعضه بس بجد كنت مبسوطه جدا حسيت ان هى دى بجد البلد اللى كلنا عايزنها
افلاطون لو كان عايش وشاف الميدان كان عرف ان المدينه الفاضله اتحققت على الارض

رساله الى سجانى

ساتمرد على وضعك القهرى ...ساثور على القيود التى كبلت بها يدى منذ يوم مولدى -وكأن هذه هى هديتى لقدومى للحياه- كبلت بها يدى حتى صرت انا وقيودى لا ننفصل

ساثور على الذل الذى طالما ارضعتنى به وصار يجرى فى اوصالى ...وفطمتنى على القهر حتى صرت لا اعرف غيره سبيلا ...وفى تصورك ان هذه هى فروض الطاعه التى يجب ان اقدمها ...ونسيت او تناسيت اننا خلقنا احرار ومهما زاد قهرك فان هذا لن يقمعنى بل زادنى تطلعا ليوم الحريه الذى اكسر فيه قيودك

لكن حان الوقت كى اقتل القيصر داخلك ...حان الوقت كى ابسط جناحى واحلق بعيدا عن زنزانتك الخرسانيه
وفى الختام سلام ونصيحه لا تغضب فلقد كنت ولسنين طويله ترينى ما تعرفه عن التربيه ...لذا اتركنى اريك ما اعرفه عن الطاعه والاحترام