وانا اكتب الان وبمنتهى الصراحه رايى فى المجلس العسكرى لا اعرف اذا كان سيلقى اصداء واسعه لدى الناس ام لا والاهم هل سيلقى اصداء واسعه لدى المجلس ام لا ولا حيقول عليه كلام مخابيل والمقصود بالاصداء الواسعه هو الا يعجبه ما اقول فيفعل بى كما يفعل بكل المدونين والتويتريين والفيسبوكيين ايضا وغيرهم من مستخدمى التكنولوجيا الحديثه الذين يخرجون كبتهم من المجلس العسكرى على هذه المواقع فلا يكون من المجلس ان يفعل بهم ما لم يستطع ان يفعله اى كائن قبله ويستدعى هؤلاء الشباب وكل واحد وحظه يتضرب بقى لحد ما يبنله صاحب والله بقى له صحاب كتير زى اسماء ولؤى يعفو عنهم ملهمش حد وغلبانين يعمل فيهم زى الناس اللى اداها احكام والناس التانيه اللى لحد دلوقتى محدش يعرف عنهم حاجه وده اكبر مثال على ان الخيار والفأوس موجود كمان حتى فى الحبس لو رجعنا بقى لشخصى الكريم فالمجلس لن يقلق اطلاقا فانا اهلى فى الاغلب الاعم حيتبروا منى عشان يعرفوا يربوا باقى اخواتى بدل ما يتيتموا
المهم بقى وانا قاعده كده فاضيه ومبعملش حاجه قررت اعد ادردش معاك ياعم المجلس طبعا انت معندكش اعتراض
افتكرت زمان زمان اوى يجى كده من 7 شهور لما حضرتك نزلت الميادين وشفت المتظاهرين وهما طبعا بطيبه قلبهم فضلوا يهتفوا للجيش مش ليك ويبوسوا فى الجيش ويتصوروا مع الدبابه وكل الحاجات اللى حضرتك عارفها دى طبعا الموقف معجبكش وخلى منظرك وحش اوى المهم اتضريت طبعا ترفع الرايه البيضاء وطلعتلنا باغنيه الموسم "الجيش حمى الثوره" ومن يوميها وانت مسكلنا فيها
طبعا كانت بتحصل الكوارث ادامك وانت واقف تتفرج يعنى تيجى موقعه الجمل متفتحش بقك متدفعش عن الثوار ولا حتى عن اللى ضرب الثوار لا الصراحه راجل
وييجى عساكر من عند حضرتك ينضموا للثوار حضرتك تاخدهم توديهم ورا الشمس محدش يعرف مكانهم .هما فين صحيح؟
واخر يوم وبشهادة الشهود لما اتنحى عمو حسنى تيجى حضرتك تضرب ناس وتاخدلك رزمه ناس ومحدش يعرف عنهم حاجه
تيجى بعدها انتفاضه فلسطين التالته يقف شباب زى الورد ادام سفارة لمؤاخذه اسرائيل تاخدهم محدش يعرف لهم طريق جره وترجع تقول انك حميت الثوره
تساوم اهالى الشهدا عشان يتنازلوا عن المحاضر اللى عملينها وترجع تقولى حميت الثوره
تحاول تهزر معانا هزار تقيل شويه وتعمل قانون تجريم الاعتصامات والمظاهرات فى سابقه من نوعها وتقول حميت الثوره
تعد تطبطب على اللى عليهم قواضى فساد وقتل متظاهرين وطبعا اكبرهم مبارك وتاجل كل شويه فى المحاكمات ومتطلعش قرار ضدهم غير لما الناس تتظاهر وتعتصم وبرضه برضه تقول حميت الثوره
تحطنا فى الغساله وتشغلها على اعلى سرعه وتقلبلنا دماغنا بتعديلات دستوريه ودستور جديد وبرلمان نضيف وكل الكلام الكبير ده وتنسى المبادئ الاساسيه للثوره "كرامه.حريه.عداله اجتماعيه" وبعد كده تخترع مبادئ فوق دستوريه وكل ده عشان تدى نفسك شرعيه مزيفه
واخر بلاويك السوده تضرب الناس فى التحرير وتمشيهم بالعافيه وتكسرلهم خيامهم واجهزتهم وتحتل انت الميدان وشكلك كده قريب حتهتف ضد الشعب
وحساك كده قاعد ومرحرح وشكلك ولا ناوى تنقل السلطه نقل سلمى ولا حتى مش سلمى .ايه هى عجبتك الاعده عادى يعنى ده احنا نضيفوك برضه ولا نضيفوك ليه مانت بقيت صاحب مكان وواخد راحتك عالاخر اهو
والوضع يخويا زى ماهو ولا اجور الناس زادت ولا بقت عايشه احسن ولا سرعت بالمحاكمات حبه وكمان لغيت العلنيه ووصلنى كده ان اللى انت واخدهم لحد دلوقتى وصلوا ل12000 حقيقى الكلام ده ولا اوشاعات
والزغلول الكبير بقى اخر حاجه اللى لسه حاصل ولا انت مسمعتش مات 3 جنود عالحدود فين بقى يخويا بياناتك الجامده اللى كل شويه بتطلعلنا بيها والاهم اين صباع الفنجرى يعنى اشمعنى الحاجات بتطلعلنا احنا بس
يعنى تقريبا دى اغلب الحاجات واتمنى مكنش نسيت حاجه فى نشيد الذكريات ده
وسؤال بقى اخير للمشاهدين اللى يعرف الاجابه حياخد محاكمه عسكريه مجانا .هو المجلس العسكرى حمى الثوره من ايه بالظبط ؟من نفسه؟؟؟؟؟؟؟
