خالتى سلميه بتسلم عليك

ابتدا الموضوع لمابدينا ننفى عن نفسنا تهم وهمية لما ابتدينا نقول احنا اهو احنا ولاد ناس احنا مش بلطجية احنا اهو بنضف الشوارع احنا بنحب بلدنا احنا ثورتنا سلمية

وكأن كل الدم اللى سال فى الشوارع وغرقها مش كفايه وعلى اساس اللى مقتنعش بالدم حيقتنع بكلمنا وهتافاتنا عن السلميه والوطنيه ونفى التخابر لدول اجنبية ونفى الاجنده عن عقولنا وطريقنا

وكأن الدم وحده مكنش صادق ومكنش كافى وكأننا فى زمن بنقتل الحر وناكل لحمه وهو ميت ونقول عليه بلطجى عشان مخدش "شاور" بتاعه قبل ماينزل!!!! وكأن كتاب كيف تصبح ثائرا صفحه 1 بيقول اصحى الصبح خد الدش المعتبر البس الحته اللى عالحبل حط البرفان بتاعك وانزل اهتف وطالب بحقك فى عيش وحريه وعداله اجتماعيه ومكتوب ملحوظه فى اخر الصفحه اللى يحب مصر ميخربش مصر.على اساس اللى بيحكمونا وخربوها دول استثناء ماداموا حكام علينا

ياساده الثائر اللى عالفرازه المستريح اللى بيطلع فى التلفزيون ولما يتقبض عليه الاف من "ولاد الناس" يدافعوا عن حقه هؤلاء لايصنعون ثورات انهم يصنعون تغيير شكلى فى السلطه فقط واظن على يدنا

فى ثوار حقيقين مشفنهمش اويمكن شفناهم وقلنا عليهم دول مش ثوار شكلهم بلطجيه عددهم كتير ماتوا واتسجنوا واتسحلوا ومحدش يعرف عنهم حاجه عشان مش مطابقين للمواصفات زى عمر صلاح الولد اللى احنا افقدناه هويته حتى بعد مامات مبنقلش اسمه بنقول "الولد بتاع البطاطا" لا الولد ده له اسمه وله هويه وعنده احساس بالمسؤليه اكتر مننا بكتير سلبناه هويته وطفولته وهو عايش وكمان حنسلبه منه بعد ما اتقتل "خطأ" على ايد واحد غشيم وفى الغالب مش اكثر من عمر ثراءا ولا حظا ولا حاجه بس بينفذ اوامر جتله بان هما دول اعداء البلد اللى مش مخلينك مستريح مع انه لو فكر ثانيه واحده لو سمع هتاف واحد كان عرف الحقيقه لكن فضل انه ينفذ الاوامر ويقتل طفل بيصرف على عائله كامله حياته مكنتش كويسه السؤال هنا بقى ايه اللى ودا عمر هناك ايه اللى كان مخلى عمر وسط الضرب والاشتباكات ليه عمر مش فى المكان اللى المفروض يكون فيه بيلعب او بيتعلم الاجابه ان اللى خلى عمر هناك احنا لما ابتدينا نصنف الناس على اساس شكلهم واخر مره قابلوا فيا الحمام والميه كانت امتى.فبقينا بنعدى من جنب عمر ونبص بأرف شديد ونقول ده شكله بلطجى ولا تلاقيه هربان من اهله او اى هرى من ده وسبنا ناس تتاجر باسمهم وتاخد من سعادتك فلوس عشان تريحلك ضميرك وتحسسك انك فعلا بتعمل حاجه عشان الغلابه ومصلحه الناس دى ان عمر يفضل زى ماهو وتفضل انت تقول عليه بلطجى. عمر وش مش حننساه ومش لازم ننساه ولو نسيناه فتاكدوا ان ضميرنا ماتت مع عمر. لاتجعلونا عبرة مرتين.....